AU – ਐਡਵੋਕੇਟ ਗੁਰਵਿੰਦਰ ਸਿੰਘ ਪਰੂਥੀ ਨੇ ਪਾਈ ਇਤਹਾਸਕ ਤੱਥਾਂ ਦੀ ਸਾਂਝ
ਟੈਮਵਰਥ(ਆਸਟ੍ਰੇਲੀਆ AU ) ( ਪਰੂਥੀ ) ਆਸਟ੍ਰੇਲੀਆ ਦੇ ਸੂਬੇ ਨਿਊ ਸਾਊਥ ਵੇਲਜ਼ ਦੇ ਇਲਾਕੇ ਟੈਮਵਰਥ ਵਿੱਚ ਵਸਦੀਆਂ ਸਿੱਖ ਸੰਗਤਾਂ ਵਲੋਂ ਮਹੀਨਾਵਾਰੀ ਗੁਰਮਤਿ ਸਮਾਗਮ ਆਯੋਜਿਤ ਕੀਤਾ ਗਿਆ ।
ਟੈਮਵਰਥ ਵੈਸਟ ਪਬਲਿਕ ਸਕੂਲ ਦੇ ਖੂਬਸੂਰਤ ਹਾਲ ਵਿੱਚ ਸਤਿਗੁਰੂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਪਾਵਨ ਹਜ਼ੂਰੀ ਵਿੱਚ ਪਹਿਲਾਂ ਸੰਗਤੀ ਰੂਪ ਵਿੱਚ ਸ਼੍ਰੀ ਸੁਖਮਨੀ ਸਾਹਿਬ ਦੇ ਪਾਠ ਹੋਏ। ਉਪਰੰਤ ਸਜੇ ਦੀਵਾਨ ਵਿੱਚ ਬੀਬੀ ਪਰਮਜੀਤ ਕੌਰ ਅਤੇ ਮਾਸਟਰ ਹਰਸਾਹਿਬ ਸਿੰਘ ਨੇ ਗੁਰਬਾਣੀ ਕੀਰਤਨ ਦੀ ਛਹਿਬਰ ਲਗਾਈ।
ਇਸ ਦੌਰਾਨ ਜਲੰਧਰ ਤੋਂ ਆਸਟ੍ਰੇਲੀਆ ਦੌਰੇ ਤੇ ਗਏ ਐਡਵੋਕੇਟ ਗੁਰਵਿੰਦਰ ਸਿੰਘ ਪਰੂਥੀ ਨੇ ਇਤਹਾਸਕ ਤੱਥਾਂ ਦੀ ਸਾਂਝ ਪਾਉਂਦੇ ਹੋਏ ਟੈਮਵਰਥ ਦੀਆਂ ਸੰਗਤਾਂ ਦੇ ਇਸ ਨਿੱਗਰ ਉਪਰਾਲੇ ਦੀ ਸ਼ਲਾਘਾ ਕਰਦਿਆਂ ਉਨ੍ਹਾਂ ਨੂੰ ਵਧਾਈ ਦਿੱਤੀ ਅਤੇ ਕਾਮਨਾਂ ਕੀਤੀ ਕਿ ਟੈਮਵਰਥ ਵਿਖੇ ਜਲਦੀ ਗੁਰੂ ਸਾਹਿਬ ਦੇ ਨਿੱਜ ਅਸਥਾਨ ਸਥਾਪਿਤ ਹੋਣ।
ਇਸ ਤੋਂ ਪਹਿਲਾਂ ਬੀਤੀ ਰਾਤ ਸਤਿਗੁਰੂ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦਾ ਪਾਵਨ ਸਰੂਪ ਲੱਗਭਗ 300 ਕਿਲੋਮੀਟਰ ਦੂਰ ਨਿਊ ਕਾਸਲ ਦੇ ਗੁਰਦੁਆਰਾ ਸਾਹਿਬ ਤੋਂ ਲਿਆਂਦਾ ਗਿਆ ਜਿਸ ਦੌਰਾਨ ਦੱਖਣੀ ਟੈਮਵਰਥ ਵਿਖੇ ਰਾਤ ਦੇ ਸਮਾਗਮ ਹੋਏ। ਇੰਨਾਂ ਦੋਨਾਂ ਸਮਾਗਮਾਂ ਦੀ ਪ੍ਰਬੰਧਕੀ ਦੇਖ ਰੇਖ ਗੁਰਿੰਦਰ ਸਿੰਘ, ਬੀਬੀ ਉਪਿੰਦਰ ਕੌਰ, ਗੁਰਪ੍ਰੀਤ ਸਿੰਘ, ਟੈਮਵਰਥ ਦੀ ਸੰਗਤ ਦੇ ਸਹਿਯੋਗ ਨਾਲ ਕਰ ਰਹੇ ਸਨ।
ਸਮਾਗਮ ਦੌਰਾਨ ਸਨੈਕਸ ਅਤੇ ਗੁਰੂ ਕੇ ਅਤੁੱਟ ਲੰਗਰ ਵਰਤਾਏ ਗਏ। ਸਮਾਗਮਾਂ ਦੀ ਸੰਪੂਰਨ ਸਮਾਪਤੀ ਉਪਰੰਤ ਗੁਰੂ ਸਾਹਿਬ ਦਾ ਪਾਵਨ ਸਰੂਪ ਪੂਰੇ ਸਤਿਕਾਰ ਸਹਿਤ ਨਿਊ ਕਾਸਲ ਲਈ ਰਵਾਨਾਂ ਕੀਤਾ ਗਿਆ।
AU
